龍貓

洗面既時候，我唱起 "龍貓" 既粵語版主題曲，老婆突然問我......
老婆:「你唱咩歌呀??」
我: 「龍貓囉....」
老婆:「邊有粵語版架? 你自己亂作既!!」
我: 「你無聽過咩? 真係有架!!」
老婆:「再唱黎聽下，同埋邊個唱架??」
我: 「我點知邊個唱呀.............」(跟住唱左一次)
老婆:「哈哈哈!!!! 都未聽過，肯定係無粵語版呀.......」

我深深不忿咁走左入房，用左十五分鍾上網搵證據，攪錯!! 居然連 you tube 都無!!! 最後只係搵到歌詞同一個 corrupt 左既 ram 檔案，仲俾我搵到係邊個唱既添，就係......................DIANA!!

跟住我即刻叫老婆入黎，話佢知呢個事實，點知佢話......「好啦好啦，當係有啦....」
咩叫當係有呀?? 明明係有架麻......你地有無人聽過呀?

「快樂既人 快樂既心 天空充滿了水中充滿了開心
美麗既人 美麗既心 看看那美麗鞋印 留下了一夥夥的愛心 林內有些神奇事疑幻疑真

叢林內有些事情吸引人 跟蹤著多興奮 讓我去慢慢追尋 像發現開心的細菌
叢林內有保護神看顧人 彷彿是它很近 龍貓竟變做我的良朋 靜悄給我愛護和關心
情誼點點心中印 啦……」

聚一聚

尋晚一行六去了銅鑼灣新羅寶食韓燒，再加埋一個未出世既bb，每人食二百幾蚊都唔飽，於是大家帶住半飽既肚，浩浩蕩蕩咁走左去利苑附近既 Inside Out 再食野加飲野。一坐底已經好似餓鬼咁,又兩磅雞翼、又大burger、仲potato skin、hoegarden......一路又飲又食，情緒高漲，又傾又笑，大呼過癮。

我地呢班朋友都好少有咁既活動，皆因大部份已結婚，有人仲就黎生仔添，再遲下一齊出黎可能真係要去麥當奴或者 pizza hut。。。「媽媽，我要食雪榚!!」。。。救命!!

我都忍得你耐!!!

我都忍得你耐啦!! 由舊年九月忍到你而家，見到你就眼冤，終於可以唔駛同你住埋一齊!!

以上係我同SALLY對舊"藍色"窗簾的控訴。有舊即係有新。。。無錯!! 我地已經全屋換上新窗簾啦!!! 煥然一新既感覺實在太好........

愛上了。。。亦舒

最近我同老婆愛上了到圖書館借書，原因是我們己過了漫無目的在街上閒逛的階段，最舒服莫過於家中，但老窩在家又無所事事，最後我們想到了這個免費活動。

開始時都是SALLY挑的亦舒小說，我只是有天隨手拿來一看，便停不了。

在"只有眼睛最真"裡，他/她說: 「苦出身的人，赤手空拳，衣不蔽體打天下，沿途執拾戰場上人家丟棄的爛盔甲兵器，湊合著用，咬緊牙關死挺，熬不住，倒下來，也無人可憐。」「但是有些人，生下來甚麼都有，整隊兵跟著他，彈藥庫就在後園。」

我不是苦出身的人，亦沒有後園放彈藥庫，但總算有一定的彈藥，比上不足、比下有餘，那有理由不成功?

「各有前因莫羨人。」

My day

Two & a half months??? I haven't update my blog for more than two and a half months??

Hell.......what have I been doing? Em.......studied for the exam which completed by the end of May......Ar.......I was obsessed with my new xbox360 for some time.

Today is a remarkably super discouraging day, the first day of my new job.....full of surprises!! Deduction of AL, Manager resignment, zero bonus record, ragged office...etc.

小寶變身七仔

之前帶左小寶去剪毛，成身短晒得番個頭同條獅子尾，十足十"長江七號"裡面隻七仔，我差d想將佢個身噴埋做綠色，咁就直頭一模一樣。

但係唔知係咪間舖頭用左好多濃味既沖涼液，攪到七仔超唔鐘意，不停咁舔身，食唔安坐唔落咁，見到佢都辛苦。結果過左兩日先好d，家陣已經回復正常，經常成條臘腸咁周地碌。。。

其實小寶仲有好多"朵"，例如 "寶皮"、"條皮"、"肥鬼".......唔知會唔會攪到小寶思想混亂既呢?

愛上了。。。G-Shock

之前睇完 "Deaths of Ian Stone"，見個男主角戴住隻G-Shock幾靚，又見到地鐵周圍G-Shock廣告果隻好似好型咁，心郁郁四圍睇，又想要有跳字，又想要行針，揀黎揀去都係買左地鐵廣告果隻，但係黑膠帶，老婆話好睇d，依家成日帶住，好鬼鍾意!!!

愛上了

發覺自己是個三分鐘熱度既人，而且心多多，呢樣又想試，果樣又想試。於是我開了一個新既topic 種類為 "愛上了"。

最近join 了gym，愛上了跑步...每次跑佢廿分鐘，仲可以一路聽住耳筒睇電視一路跑，跟住沖個涼 - 正呀!!

佢係彪哥，唔係 "了哥"

人人上到黎我屋企都叫彪哥做老鼠，其實非也非也............彪哥係 "倉鼠" 類中既金毛鼠，身型較其他倉鼠大但性格溫馴。

彪哥入住陳家既時侯只有一隻手指咁大，個樣成隻豬仔咁。但係不知何時佢突然變左隻大肥豬，連間屋仔都瞓唔入而要住上閣樓。於是我地就對佢展開糧食配給減肥計劃，經過數星期，依家佢真係細隻返小小，有番條腰......哈哈!!

新居、朋友、陳寶豬

搬了新居已有五個月的時間，就趁在之前的新年邀請了很多朋友來家裡玩，踩旺下個場 ，嘩哈哈.......

大家的焦點所在自然係家中的新成員二號......."陳寶豬"，即係我地隻貓。點解叫陳寶豬? 佢其實叫小寶，我老婆成日"小寶豬、小寶豬" 咁黎叫佢，小寶又係陳家既成員，所以咪叫"陳寶豬"囉!!

此寶豬同螢幕既寶珠姐真係有得揮，超受歡迎，個個一見到佢到話佢 "好得意呀，個頭咁大既，好肥喎"。咁寶豬又好識招呼朋友，你一掂佢，佢二話不說瞓低反轉個身任你摸，跟住d人就會話 "你呢隻咩貓黎架? 成隻狗咁既?" 其實小寶得個頭大架咋，個身無乜肉既，仲有佢真係超痴人.......成日跟出跟入，同隻小狗無咩分別。

我地實在太偏心啦，陳家其實仲有一個成員都好得意架，佢就係..........彪哥...哥....哥!!!!!!!! 等我下次再介紹佢先。

已婚男仕的對話

前幾天和好友粉皮/ 英俊食飯，突然不知從何說起物價高漲，粉皮就話 : "d米幾貴呀，比我平時買開貴左成差不多十蚊"


大滾: "係啦，d肉先貴呀，之前買十蚊得果少少，煮肉醬意粉都唔夠，結果又要買多包先得。出街食好似仲平"

英俊: ".............." (無言地食緊煲仔飯)

故事仲未完喎，食完糖水我同粉皮一齊坐巴士走，物價話題又黎......


粉皮: "都唔知點解d 煤氣費咁貴既，成四百蚊個月，我地又無煮飯" "用電熱水爐真係平好多，不過慢，如果唔係就黎搬我都換，三千幾一個起碼住番佢兩、三年先回到本"

大滾: "係? 呀....我家陣換有無so呢? 不過個爐好新喎，又可以即熱"

粉皮: "咁就唔好換住啦"

大滾: "咁又係"

斷六親

呀爺生日飯，呀爸話帶埋另一個人黎，我費事俾人當馬騮戲咁睇所以決定唔去，私下再約爺食飯，咁即係等如以後唔駛見面? 我有錯?

一家人幾個月都唔一齊食餐飯，一出又話要上呀媽另一個人度食，出街食都唔得，我真係唔想，咁即係唔理呀媽感受? 仲要比人問係咪淨係識上呀媽同自已度? 又係我錯呀?

家姐一年都唔上呀媽度夠五次，話有隻貓，佢奶奶夠有隻死人狗啦，佢又成日死上去? 佢係唔上九千個理由都有啦，又係我錯呀?

諗住留隻貓陪呀媽，依家養左另一隻，仲要係人地唔養比我既，咁又要鬧!! 又係我衰呀?

係我太執著? 太放唔開? 好啦.......你地話咩就咩啦，橫掂我呢輪都好似就黎斷晒六親咁架啦.............

Blog

發現身邊d朋友更新blog既步伐超慢，以前兩、三日更新一次變做幾日、甚至十幾日先更新，唔知係咪去晒玩facebook呢?

facebook 對我黎講都唔係幾好玩，send 花呀、test呀，唯一係可以見番d舊朋友，唉......我都仲未夠100個朋友，死thonnie!!!