巨龜回來了!!!

可能有朋友聽聞過我以前曾飼養過兩隻巨型陸龜，但跟巨龜見過面的人就不多，因在兩年多由於地方淺窄已轉讓給他人飼養。

今天跟阿媽通電得知由於飼養人無法繼續養，龜龜居然又回到我媽家中，我當然是第一時間上去探望佢啦!! 佢依然好精神、好大隻，成架坦克車咁周圍行，好鬼過癮!!

如果有朋友想親眼見下佢就好快d，因為可能又會幫龜龜搵合適既主人。

集圖冊

集圖冊可算是我跟家姐及阿媽的愉快回憶。

現在我還保存著小時三個人一起儲的集圖冊，印象最深的是捉鬼敢死隊，應該是小四的那年，我們住在香港仔，阿爸經常打麻雀至三更半夜或甚至不回家，我們三個便到對面的小書局買集圖冊的貼紙。現在回想，阿媽的婚後生活好像一直也不是很愉快的。

除了捉鬼敢死隊，我還有世界杯、變形金剛、動物、恐龍、x-men以及最近期的star wars．．．哈哈哈！！！其實所謂的集圖冊只不過是卡通或電影的鏡頭snapshot印成貼紙而已，但總會有十張八張的特別貼紙，比如閃底、透明、人形等等。

到了今時今日我仍然喜歡儲集圖冊，剛剛在７－１１好像見到有 "The Golden Compass"的集圖冊呢！！！hohohoho....................

新生活

感覺上結婚後的時間好像比婚前少了很多，每晚轉個頭便要睡覺，什麼也沒有做過的。

原因可能是一來不是上我媽家食飯就是上外母家吃飯，這樣就一晚了.......要不是就自己煮，吃完、洗完又大半晚了(雖然到目前為止都是我的好老婆買/煮/洗包辦) Yeah...........

看來還要多一段時間才能抓到新生活的節奏。

Mission Accomplished

結左婚、去完渡蜜月、野又買夠、錢又用晒，終於返到香港上班。

諗番結婚果日真係好似一場夢，做過d咩，講過d咩，要睇影片先記得。好多謝一班兄弟既幫忙，係呢個婚禮我見到兄弟們既另一面，平時爛玩的他們，當日所有野替我安排得妥妥當當，d野我一出聲即刻有人幫手，好似好友L先生，連續三日做我司機攞衫、兄弟車、還衫，仲要改埋原本上堂既時間，攪到我都唔好意思。

仲有ben 哥仔，我地夾硬搵左佢做 MC，雖然對佢黎講有d難度，但係我好鐘意佢認真既態度，開席前一直同女MC又夾稿又對rundown。不過佢就成晚同我講左幾次唔好意思話做得唔好，其實我並唔係要d超talk得既MC，只係想有個熟我既朋友幫我手，何況你果晚既表現已經超水準，好淡定! ^^

我印象最深既係我伴郎 B 君，佢出乎我意料地認真，攞野、招呼朋友、送客、甚至連招呼伴娘都做得極好，好多野我講一句即刻攪掂晒，令到我成日無野甩漏，好完滿!! 我果然無揀錯人。
當然仲有其他兄弟既幫手，每人都完成自己既任務，令到我呢個 mission successfully accomplished，多謝晒!!

心沉

一個月過去，裝修終於攪掂，帖印好，禮服/鞋買好，都可以話d野已經八八九九，連新屋都入埋伙。

多年來儲存的zoids 終於出問題，執屋既時候我將 七八十盒zoids攞出黎慢慢放上兩個天花柜，執到一半既時侯sally開始變樣咁話 “唔得啦，再見到你呢d野我發癲啦!!”
可能係多到誇張左，但我又唔係叫你同我一齊玩，我又唔係一日到刻坐係度玩，咁又發癲? 我已經掉左好多好多其他野啦，咁係咪要掉晒我d野先得呢? 執半個鐘就發癲走人，咁仲有成屋野幾時先執得晒呀? 咪又得我自己慢慢執。

我又要考試，真係顧唔得晒咁多濕碎野….

仲有54日

轉個頭又九月(我個頭係比較大)，要處理既事情凶湧而至，包括結婚、裝修、搬屋、上堂、考試、補習。。。

d野多到打blog都打唔黎，亦無心機去打。尤其裝修，我同sally行條上海街都行左不知幾次，本來以為好快，點知又地磚、又水龍頭、又燈、又面盆，嗌晒救命，攪到我地d脾氣都差左(雖然我一向都差..哈哈)。前一輪仲要無得上網，困o係一個貨倉咁既屋企心情極度低落(因我d物品無拆箱)，呀媽問我聽日去邊我答佢去跳樓死，跟住俾佢鬧。

仲有兩個月時間所有野就告一段落，應該唔死得既。好多謝好友D先生久不久都打黎問候下我，搵我食下飯，唔駛等我香左發臭都無人知，哈哈! (睬!講埋d咁既衰野)

今天晚上

今晚食了一餐豐富又好味的海鮮餐，有生蚝、翡翠螺、麵包蟹、大龍虾沙律、龍虾湯、上湯龍虾伊麵，飽得吃不下要帶走。第一次食麵包蟹，精粹係佢個蟹蓋，一大個裡面全都是膏，塞得滿滿像是饟入去的，超好味!!

龍虾伊麵亦做得好好，d伊麵唔會太軟一入口就爛，好有咬口，諗起都流口水，下次一定要再去食。

食完飯去了睇 “五星級大鼠”，通常我們話想睇的戲到落畫都未睇，今次趕得及都算難得。
好多謝莎莉蛋糕給我安排一餐咁好既，thank you 晒!!

一隻廿八歲既羊

轉眼又一年，又大一歲。

以前細個好期待生日，因為可以有生日禮物。總會有例牌式的砌蛋糕、影相環節，呀爸呀媽總會問我想要乜野，但通常講完之後，佢地都會彈三彈四，結果又係買另一樣俾我。

今年生日突然開始有壓力，不是怕變老，是怕接近三十歲仍一事無成。禮物、蛋糕及慶祝對我來說已變得不重要，呀爸甚至想把利是給我媽再轉交給我，連見面也不用了。唯獨呀媽及sally會花點心思買禮物、食下飯。實際上這個家已散，有心酸的感覺嗎? 有時只要不去想不愉快事，慢慢那種感覺便會變淡，直至連自己也相信已沒有感覺，麻木了，刺也不痛，燒也不痛。。。。

我最想要的禮物是理想的成績，這樣我安排的路才能走下去。

等了又等

轉個頭又差不多到八月底，等考試結果真係等到頸都長都未有，真係折磨!!
亦代表好快又要開學，全情投入去讀書，努力、加油!!

書

最近買了兩本書來看，第一本叫”A Scientist Presents Evidence for Belief the Language of God”(下稱A書)，而另一本則是 Charles Darwin 的 “the Origin of Species”(下稱B書)。

我鍾意睇書，但亦鍾意打機啦、睇dvd啦、砌模型啦。。。結果分配給書本的時間好少。我不喜歡睇小說，除了Mitch Albom 的小說外，喜歡睇一些資料性質既書，好似 “A Short History of Nearly Everything”及”the 911 Report”等，故書柜上的一系列在加國買的小說幾乎沒有動過。
我是在灣仔三聯看到A書的，拿起來一看便停不了，結果買了回家。它是一位科學家述說科學怎樣可和基督教共存，值得一看。

而B書是我一直想知”進化論”是怎樣的一會事，不應只是”人的祖先是馬騮”這麼簡單。雖然有人說Charles Darwin在死前已推翻了這個理論，但我就是想知道一個和基督教唱反調的理論的內裏乾坤。

最後送上A書的一句話 “Doubt isn’t the opposite of faith; it is an element of faith”。

周六晨早賽馬直播

現在上網登記註冊結婚，可在三個月前的十四天內上網交表格。而我們的交表天就是今朝早上八點。

找了約十位朋友幫忙，前一晚便逐個致電解釋步驟、調時間、資料。自己亦練習了十多二十次，保證速度快、打字準、資料準!

一點多入睡，三點多醒一醒，看看鬧鐘後再睡; 五點多又醒，六點又醒，六點多又醒，七點未夠半又醒，於是起身開電腦又練習，心情越來越緊張，好像比考LAW exam 仲要緊張。雙手開始冰冷，這是我極緊張時的symptom。

好啦，七點五十九分零五十三秒，開閘!!

一開閘既時候，九號既”大滾友”用極速登入，之後佢熟練咁揀左日期，跟住入埋ID資料、生日同電話就click繼續。一轉入直路既時候，見到佢開始手震但係依然頂住揀理地點，仲paste埋個password。到最後二百米，”大滾友” 極速衝刺檢查資料正確後按下遞交，過終點!! 成功攞到籌號12，場地籌號3。

真係要點名多謝一班晨早起身幫手既朋友，包括: Thonnie、阿嬸、Gilbert、Rachel、Vanessa、Emily Fan、Grace、Annie、表妹、BEN 哥仔。仲有幾位有心幫忙的朋友: Emily Fong、伴娘、羅小b、Eva同 Kenneth。多謝晒!!

男女平等

今天上ESD Life網站看看結婚的資料，發現有很多門不同的投票，其中有兩項有點奇怪。

第一項是問”婚後財政支出會怎樣安排?” 有三成多的人認為大部份應由丈夫負責。

第二項是問”婚後的家務會怎樣安排?” 有差不多四成的人認為應平均分擔，因為現今男女平等。

好了，既然大家主張男女平等，為何此情況只出現在家務安排呢? 財政支出依然由丈夫負責大部份? 這是那門子的平等?

我並不是小家在算著度著，只是想說其實男女平等是不存在的，男仕們願意做家務實是出於對你們的愛錫，小姐們不要再打著”男女平等”的旗號來橫行了。

D先生的手信

好友D先生和女友J小姐到日本遊玩，承蒙愛戴買了份手信給我。D先生自此每次見面便”提醒”我給他的禮物寫篇blog，不勝他的疲勞轟炸現舉手投降。其實在下已講過九千三百二十六次，呢處唔係蘋果日報，並不接受任何私人要求，除非筆金豐厚，在下則另作考慮。

話說如此，買手信重的是一份心意，證明在旅行的百忙中朋友仍記得我，心裡已是滿足。而且有時聽到別人喜歡看我的blog亦是開心。

手信是一個卡紙大阪卡通少女捧著雙乳，而雙乳則是布丁，我已啜食了她的右乳(是把它冷凍後和sally一齊食的!!) D先生你有興趣和J小姐分享她的左乳嗎? 就當是你某程度上已帶回一個”日本妹”送給我的回禮吧，哈哈……

人品? 酒品?

幾年前睇過一套講打麻雀的電影，記得華仔有句對白“牌品好，人品自然好”。想了一想，好像不太對，相反如果人品好，牌品好的機會比較大。又或者應該說牌品差的人，人品好極有限。

那麼酒品呢? 人是否真的會醉到一步連自己做乜都唔知? 在我的立場是不可能的，人醉至極會倒下來，這我可接受。但如果還可作出 “選擇性”或者 ”目標性”行為的時候，那個人是還有意識的，只是他/她放縱自己作出不負責任的行為! 這些行為我叫作 ”借醉行凶”，極不要得的行為是也。同時亦反映出他/她本身意圖不軌，人品低劣。

可能有人覺得我反應過激，但我今次真係怒火中燒，亦對某些人失望透頂。古語亦有云 “一隻手掌係拍唔响既”，感謝好友S小姐的明言。

野獸

一個星期總會有數晚拿著notebook 坐在床上寫blog，想想有沒有什麼想記下來的。沒有寫的不代表不重要，只是沒有感覺去寫。

原來我是一個依感覺去做事的人? 是的，其實感性支配了我的大部份，一旦對某些事產生了感覺便不可收拾，所以經常要用理智把另一半控制住。看上了的東西通常在一至兩星期內便要買到手，因為我的腦會不斷的想，不停的想，直至買到為止。

運用理智去控制情感也是一門很深的學問，有時候情感會像一頭野獸，不是說把它牢牢鎖起便行，給它掙脫了後果可能更嚴重。反之你久不久放它出去跑一跑，消耗它的力氣，它會更加受控。當然，你要在適當的時候把它拉回來，否則它過分興奮便變得難以收服。

而我，近來似乎野獸當道了。

生老病死

之前好友B的麻麻突然在飛機上中風，情況嚴重，連美國的醫生亦拒絕醫治，但後來情況有變，醫生開始肯治療。本以為有好轉 (係我心想)，突然今日睇到好友B個blog後，他的那份無奈和傷心我完全感受到，但真係唔知點安慰佢。

明明不是自己的親人，又與好友麻麻素未謀面，但聽到的那一刻我個心都好酸，而且覺得死亡好接受，幾乎就站在我的身邊。一個平時和自己那麼親近的人，突然可能離你而去，未講的說話以後再無機會講。

中國人的情感內歛，”我愛你”故之然難說出口，即使是關心之情亦不易明顯流露，所以總是待機會錯失後才追悔莫及。

點解既? 點解既?

之前好友B的生日聚會，如常一大班人出去飲野。呢d場合總會有人酒後發狂，大叫大嚷; 有人心情壞透，低聲飲泣又或者哭成淚人。夠竟是大家工作/ 生活上壓力太大要如此宣洩，抑或是受環境影响?

最攪笑的是我和好友B的女友C小姐傾左成半個鐘，其中佢講左一個好有趣既理論。佢話 “點解要成日飲酒呢? 個原理根本係猜枚輸左要飲，即係飲係唔好架啦，咁點解仲要係咁飲姐?” 我聽完真係坐左係度唔識講野，佢係啱，成日飲酒係唔好，但做人又唔駛下下咁理性，下下問點解既。

飲酒既好處係唔駛諗野，係咁飲，千祈咪呢個時候仲要俾d問題佢諗，點解要飲? 點解要同女仔猜? 點解要咁癲? 點解唔理我? 夠啦夠啦…C小姐，如果你為佢身體好，為你地關係好，唔好再黑面，唔好再俾hard time 佢受啦，不如你轉個方式，笑多d，嗲佢多d，笑笑口禁住佢唔好飲咁多可能仲有效啦。

我成日都講 “處理事情的方法有好多種，唔好用最差既方法啦，唔該”

夢

唔知係唔係飲左酒既緣故，尋晚發左兩大個極惡夢，攪到我瞓唔得好，諗番都得人驚。

第一個夢

我發夢自己要結婚，但係我好唔想，因為我覺得我係好唔鐘意個新娘既，之不過係為左責任。跟住我不斷問人可唔可以唔結，問左呀爸，仲有唔知邊個，佢地都話 “真係唔想結就唔好結囉”。果時已經係臨註冊既時候，跟住我行入去，終於見到個新娘，居然係我呀媽!! 仲要著住婚紗!!

我同佢講話真係唔鐘意佢，唔同佢結婚。可怕既事發生啦，下一幕我見到既係，我呀媽著住婚紗，攞住把菜刀周圍發癲斬人，不停咁叫 “點解呀!? 點解呀!?” 跟住見佢斬到成身血，然後佢望到我，衝過黎想斬我，咁我就嚇醒左啦。

一醒，我即刻問自己 “係咪要結婚呀? 自己跟住答 “係”再諗 “死喇，同邊個結呀?” 諗左一陣 “同 Sally Wong” 個人即刻定番晒，諗起 Sally Wong 個樣，我笑左一笑，跟住好安心繼續瞓。

夢 (續)

完上一個夢之後，諗住可以安心瞓啦，點知…

第二個夢

我夢見自己去探呀婆，一入個大堂 “咦，裝修左咁靚既，成間酒店咁”。然後入升降機，”咦，無M樓既?” (我呀婆係住M樓既，即係閣樓) 事但啦，上一樓再行番落去囉。可怕既事又黎啦，我推開度防煙門行落去 “咦，點解唔係我呀婆果層既?” 跟住再行，點解行黎行去都係一樓既? 如是者我行左好耐。

我行埋天井望落去，有再落一層架喎，明明有幾個女人係下邊洗衫，仲望上黎添。跟住唔知點解有幾個人走出黎，又係唔知點行落去，我問佢地點行去M樓，答案居然係 “呢度無M樓喎” 左行右行我地一齊行左去平台，再由平台既樓梯行番落大堂。但係始終都無去到我呀婆果層度。

行黎行去都係一樓既時候我真係好驚。

補習老師

繼之前俾Ben哥仔催稿後，又俾另一個朋友C話我個blog唔係日日update，叫我寫快d咁話。各位需知呢個係私人blog，本人並無收稿費的，真攞命。

上年九月由於未找到合適工作，便幫人補習。開始的時候有兩個學生，後來找到工作及自己亦要讀書，實在抽身不暇，便停止其中一個。我選擇繼續替中四、英文程度差的Rex補習，因為比起另一個小六、就讀真光的小女孩，他更需要我的協助。

一年學期的光景過去，學校考試的成績不單評審Rex的英文水平，某程度上亦代表了在這一年內我替他補習的成效。進步是有的，但並不大，奈何英文始終需時間浸淫，不是一下子可進步的科目。相對他的英文能力，更需要改善的是他的紊亂思想，一個人沒有好的組織能力，英文水平多高亦於事無補。

還記得當 Rex 的爸爸告訴我: ”學校的老師都說他的英文有很明顯的進步，相信你對他落了不少心機，多謝晒!” 的那一刻，終於覺得我的苦心是有成果的。

度呎呀度呎

考完試後寫blog的靈感居然亦隨之消失，曾嘗試重拾，但寫了一半卻完全寫不下去，所以我的文件匣中有很多篇未完成的blog。

而家唔駛讀書，感覺上時間多左，放工返屋企仲有成晚時間，於是心亦開始多，又想睇碟，又想睇書，又想砌模型，又想呢樣，又想果樣，結果又係攪到三更半夜先瞓。但呢輪成日發夢上新居度呎，前兩晚發果個夢仲好清楚度到個飯廳有11呎闊同埋個業主好人到幫我地整番幅牆 (真係發我個夢囉)。一覺醒來回到現實。